IN XICALLI / IN NAHUALLI

IN XICALLI

Ipan naltepe itoca Santa María Coapan, onca ce tepetl campa mochihua in teotlahtolli itechpa semana santa. Ipan in tlahcotepetl onca quen ce ameyalli ihtic ce oztotl tlein quipia zan tepetzin atl.

Quihtoah in huehuetzin huehca cahuitl tlacameh oamiquiah itloc ameyalli ipan Calvario Tepetl. Quihtoah ce tonalli ce tlacatl oichcapihto, oquinehnento tepepan ixquichca Calvario tepetl; melahuac tonal ihcuac oquittac in ameyalli, onehnetoc inahuac atzintli. Oquittac melahuac chipahuac atzintli, melahuac cualtzin achi hueyi, zan niman cenca amiquia ihuan cenca tlaiznequiaya, niman oquittac ce xicalli nepantla atzintli ihuan cenca oquicuiznequia inic atliz. Cenca quinequiaya cuiz in xicalli aic ohuellitih, in tlacatl omotilan ixquichca xicalli occe ihuan occe ixquichca ohuetz atzintli ihuan omomiquilih.

Axcan quihtoah ipan San Juan ilhuitl moitta in xicalli ihuan nochtin acquihuan quittah in xicalli amiquilizqueh.

Oquihcuilo Israel Piedras Evangelista

IN NAHUALLI

Mihtoa miequeh itechpa in tlahtolli nahualli, mihtoa inelhuayo quihtoznequi inahuac, nozzo ac tlaquenti in payoh, onahualti ica occe tlamantli ihuan mocuepa in yolcatl tlen quinequih. Occe tatameh quihtoah in nahualli tlahtoa itechpa in tonal, in yolcatl tlein nemi ihuan nehnemi totloc, auh ahcameh huelquimati.

Axcan naltepeh, tatameh quihtoah in nahualli ye in ahmo cualli tlacatl quenin ce tlacatecolotl. Occe cahuitl notatah onechquihtoh tlacameh oquittayah quen ce chichi quen ce mizto milpan, hueyi quen ce cahuayoh ahmo cualtzin, ahmo cualchihua. Oquihtoyah nahualli oquicuah caxtil , piomeh ihuan huehuehchoh. Ce yohualli, ce miltequihuani oquicac milla molinia ihuan caxtilmeh oquitzatzih, niman oquittac quen ce hueyi mizto inahuac tepancalli. In tlacatl oquican ipistolah ihuan oquimiquilih in yocatl. Zan niman omotlaloh tepancalli ihuan oquittac ce tlacatl ye omic, in yocatl omocuep in tlacatl, in yolcatl ocatca ce nahualli.

Oquihcuilo Israel Piedras Evangelista